خطه شاملة لتطوير نفسك فى مجال التحاليل الطبيه

دلوقتى لو واحد مبتدئ عاوز خطه يمشي عليها لتطوير نفسه فى مجال التحاليل الطبيه بشكل يمكنه من ممارسه المهنه باحترافيه ... يعمل ايه؟؟؟؟؟؟؟؟
حنحاول فى البوست ده الاجابه على السؤال بشكل علمى موضوعى قابل للتنفيذ
اولا حنقسم الشغل فى مجال التحاليل الطبيه الى قسمين
***** القسم الاول و هو الشغل العملي:
=====================
و ده الجزء الاساسي لاى مشتغل بالتحاليل (سواء اخصائي او فنى) لان بدونه يبقي انت متقدرش تمارس المهنه
الجزء ده ملوش حل غير انك تقف فعليا فى معمل لممارسه المهنه و التي تشمل الاتى
1- التدريب على سحب العينات (بالممارسه الفعليه كلما امكن)
2- التدريب على شغل الاستقبال من مقابله مرضى و قراءه ريكوست و غيره (يحتاج ممارسه حوالى شهر متواصل)
3- التدريب على شغل الكيمياء (يحتاج ممارسه حوالى شهر متواصل بشرط يكون المعمل ذو ريت متوسط على الاقل)
4- التدريب على شغل الميكروبيولوجى و الباراسيتولوجى (يحتاج ممارسه حوالى 5 شهور بشرط يكون المعمل ذو ريت متوسط على الاقل)
5- التدريب علي شغل الهيماتولوجى (يحتاج ممارسه حوالى 5 شهور مع ضروره التدريب على فيلم الدم و الشغل المانيوال لصوره الدم)
لازم نعرف كويس ان من المستحيل تلاقي معمل يقبل يدرب حد المده دى (حوالى سنه) لمجرد التدريب انما ده حيتم لما تقدم فى معمل و تشتغل فعليا فاعمل لنفسك الخطه الزمنيه دى عشان تتعلم صح
الحل البديل ان النقابه مثلا تتبنى موضوع التدريب العملى لأعضاء شعبه العلوم الطبيه عن طريق تجهيز معمل فعلى فى مقر النقابه و تبقي سنه التدريب دى كأنها سنه امتيازمثلا
***** القسم الثانى و هو الشغل النظرى:
=====================
و ده الجزء الخاص باخصائي التحاليل الطبيه و اللازم لتفسير نتائج التحاليل الطبيه و ربطها بالحاله المرضيه و ده يقع العبء الاكبر فيه عليك و على ارادتك فى انك تصبح متميز و محترف فى المجال
و عشان يبقي كلامنا محدد حنقسم العلوم الطبيه المعمليه و نكتب مع كل قسم افضل مرجع علمى تقدر تشتغل منه و تتعلم المهنه بشكل علمى صحيح
*** علم الكيمياء الاكلينيكيه: تقدر تشتغل من مرجع
Clinical Biochemistry AN ILLUSTRATED COLOUR TEXT (Fifth Edition)
Clinical Chemistry TECHNIQUES, PRINCIPLES, CORRELATIONS (Sixth Edition)
*** علم الميكروبيولوجى (البكتريا و الفيروسات و الباراسيتولوجى و المزارع): تقدر تشتغل من مرجع
District Laboratory Practice in Tropical Countries (Monica Cheesbrough) Part 1 (Second Edition)
District Laboratory Practice in Tropical Countries (Monica Cheesbrough) Part 2 (Second Edition)
*** تحليل البول: تقدر تشتغل من مرجع
Urinalysis and Body Fluids (Fifth Edition)
*** تحليل السائل المنوى: تقدر تشتغل من مرجع
WHO laboratory manual for the Examination and processing of human semen (Fifth Edition)
*** علم الهيماتولوجى: تقدر تشتغل من مرجع
Hematology in Practice (Betty Ciesla, 2007)
*** بعد كده عندنا مرجعين مميزين اوى لانهم بيشملوا فى كلامهم كل الفروع السابقه بشكل مبسط فممكن تستخدمهم كنوع من المراجعه و حيبقى كلامهم سهل كتير لانك قرأت قبلهم مراجع قويه جدا
Essentials of Clinical Pathology (First Edition: 2010)
A Concise Review of Clinical Laboratory Science (Second Edition)
*** و اخيرا بعد كده تقدر بكل بساطه تشتغل من كتب اسئله البورد الامريكى للتحاليل الطبيه كمراجعه للمعلومات اللى ذاكرتها قبل كده بحيث تصل لافضل مستوى علمى ممكن فى مجال التحاليل الطبيه
BOC study guide 5th edition
Medical Laboratory Science Review (Fourth Edition)
ملحوظه مفيش وقت زمنى محدد هنا لانها تعتمد على مدى رغبتك فى التعلم و كمان تعتمد على الوقت المتاح فعليا ليك

د| على العربى