سؤال وجواب عن فتح معمل تحاليل طبيه

السلام عليكم ورحمة الله وبركاته ... 

 بالنسبة للزملاء الخريجين وعايزين يفتحوا معمل تحاليل طبية

 دا موضوع عبارة عن سؤال وجواب عن كل شئ يخص المعمل وكمان الدبلومة........

$$ فى اﻷول كدا اى هيا مميزات معمل التحاليل ؟
(1)بريستيج كويس الدكتور راح الدكتور جه

(2)بيزنس كويس جدا والله انت لو فاهم Marketing صح لتدخل فلوس عنب

(3)مجال مضمون ى عم الدكتور ! ، ربنا يفتحها عليك ممكن تعمل سلسلة معامل .

**طبعا أنت بتدخل أى سكشن على مدار اﻻربع سنين فى أول الترم بتلاقى الطلبه بتسئل أسئله متكرره وشائعه كدا حوالين المعمل طاب خد الخلاصه دى وريح نفسك

$$أنا لو قسم خاص مافيهوش كمياء وعايز افتح معمل تحاليل اعمل اى ؟؟؟
حضرتك ﻻزم تعمل معادله اﻻول عشان تعادل بيها الناس اللى معاها كمياء والمعادله دى أحسن مكان ممكن تاخدها فيه هيا جامعه طنطا ومدتها سنه وسعرها من 8000 ل 10,000 جنيه ..

$$طيب أنا لو كميائى أصلا ونفسى أفتح معمل تحاليل أعمل اى ؟؟؟
فى الحاله دى ﻻزم تعمل دبلومه Biochemistry أو Microbiology وأفضل مكان تاخد منه الدبلومه دى هو شبين الكوم ومدتها سنه وسعرها من 3000 ل 4000 جنيه ، وممكن تاخدها من الزقازيق واﻹسماعيليه وسعرها حنين وفى اللذيذ
$$امته بقدم على الدبلومه دى ؟؟؟
فى شهر أغسطس
&الشروط ؟؟؟
معاك البكالريوس ، مش شرط مخلص جيش ، اوراق عاديه
زى شهادة التخرج وشهادة الميلاد والبطاقه الشخصيه ، وصور شخصيه كدا يعنى،والفلوس طبعا
&طبيعة الدبلومة ؟؟؟
ترمين وامتحانات وكتب وحضور وأعمال سنه ونجاح وتقدير وسقوط
&بعد ماتخلص كل دول بتعمل اى ؟؟؟
بتشوف محامى بيخلصلك شويه اجراءات .. بس كدا

$$طيب انا هفتح معمل ازاى وانا لسه خريج ومعيش فلوس للمعمل ؟؟

هبسط لك الموضوع خالص
أنت ممكن تفتح معمل فى البدايه مش شرط يكون كبير يعنى هيكون فيه
جهاز كمياء .. وسعره 25000 جنيه
ميكروسكوب .. وسعره 2000 جنيه
وماتريال اخرى..لزوم اللاتيكس والمانول وخلافه .. 2000 جنيه
قول توتال 30000 جنيه ومش شرط خااالص يكونو معاك كلهم فى اﻻول

$$ طاب ال PCR اللى سعره قد يكون بمليون جنيه , وجهاز الهرمونات اللى بحاوالى 60000 ج و جهاز ال CBC اللى بحاولى 80000 جنيه ؟

فيه حاجه اسمها Lab To Lab يعنى لو جتلك عينهPCR بتبعتها لمعمل موجود فيه جهاز ال PCR وبتاخد نص المبلغ يعنى لو العينه بتتعمل ب 100 جنيه المعمل بياخد 50 ج وانت 50 ج وانتم اﻻتنين كسبانين....

وبالنسبه لل CBC فبيتعمل مانوال تحت الميكروسكون ، لغايه العمليه ماتتظبط معاك وتفتحلك أكتر من معمل وعلى مستوى كمان

$$طاب اتعلم تحاليل ازاى ؟؟
ابوس ايدك متخدش كورسات فى التحاليل .. اتبع اللى هاقولك عليه ودا اللى عملته والله :D
(1) روح أقرب مستشفى عام واتعلم فيها سحب ، الدنيا هناك عنب وفى خلال اسبوع هتبقى برنس سحب....
(2) خلصت السحب انزل معمل بقى وشوف واحد فنى او كميائى فى معمل واتعلم معاه الشغل و يا سلام بقى لو يكون صحبك! مش هيبخل عليك بأى حاجه...
(3) أثناء وأنت فى المعمل خد معاك نوت وسجل كل معلومه واسئل ولما تروح معاك الراجل ده Google واسئله براحتك .. شهر تركيز بالنظام ده هتبقى كميائى معمل محترم
تقوم تقولى أخد كورس تحاليل! ى راااااجل وفر فلوسك ....
وبشطرتك وانت لسه بتدرس ممكن تدخل شريك فى معمل....

$$ طاب مش عارف انزل انهى معمل تدريب ؟؟؟
حدد الاول ال area اللى حابب تتدرب فيها بعد كدا ابدأ انزل وقولهم محتاج تريننج او ممكن تقولهم محتاج شغل ع طول وهما هيدربوك .. عادى جدا لو انت طالب ، متيأسش لو أول اتنين رفضوا ....

$$ لو أنا فيزيا أو جيولوجيا وحابب أفتح المعمل ؟؟؟
ﻻزم معادله كمياء طبعا ، ودى بترجع للكليه لو قبلتك تعمل المعادله عندها بعد كدا هتعمل الدبلومه ، لو مقبلتكش للمعادله .. خلاص ...

$$ وفى النهايه أحب انوه على نقطتين؟؟؟
(1)مجال المعامل ممكن يبقى بيزنس محترم بس محتاج marketing صح
(2)وممكن للناس Scientific Researcher يكون مفيد جدا لو هتشتغل على Immunology او virology يعنى مش مجرد Reagents بتحطها على بعض !

هتلاقى ناس بتحبطك من ناحية المعمل ، فكك منهم المعمل حلو وبيزنس محترم بس متعتمدش عليه لوحده ومتخليهوش سقف طموحك .....

 تجربة احد الزملاء الافاضل .......

كما يمكنكم متابعة المدونة من هنا