تحليل النحاس طريقة أختبار الـ copper فى البول

تحليل النحاس فى البول | urine copper

 هنتكلم النهارده على تحليل ممكن تشوفه بيطلب من اخصائي الكبد و الجهاز الهضمى لمريض
و هو تحليل النحاس فى البول (urine copper)

 تحليل النحاس فى البول (urine copper)
ليه بيطلب و ايه تفسير النتيجه ؟؟

 فى البدايه نعرف ان عنصر النحاس copper ده بناخده من الاكل كباقي العناصر و هو عنصر مهم بيستخدم فى الجسم كعامل مساعد للعديد من الانزيمات زى انزيم ال cytochrome c oxidase اللى بيدخل عمليه تكوين ال ATP

المهم النحاس بيوصل من الامعاء الى الكبد عن طريقه ال portal circulation
فى الكبد يتم تصنيع البروتين الناقل للنحاس و المسمى (ceruloplasmin) و اللى بيفرز فى الدم حاملا النحاس لباقي الانسجه اللى محتاجاه
فى كمان بروتين اسمه (Wilson protein) ده المسؤول عن حاجتين مهمين
الاولى انه يحمل النحاس على الناقل بتاعه
الثانيه انه يعمل (removing) للنحاس الزائد و يفرزه مع الصفراء
 طيب تعالى نتخيل عدم وجود البروتين Wilson يحصل ايه؟؟
 كده النحاس اللي بيوصل للكبد مش هيتحمل على ال (ceruloplasmin) و الزياده منه مش حتفرز فى الصفراء
اذن يترسب النحاس كده فى الكبد
فاكرين حاجه اسمها (Fenton reaction) اللى بتقوم بيها العناصر زى الحديد و النحاس و غيره و بينتج عنه تكوين free radicals
تخيل الشقوق الحره دى بقه تعمل ايه فى خلايا الكبد؟؟
 اكيد حتسب cell membrane damage
يعنى حتموت الخليه (cell necrosis)
يعنى هيحصل التهاب كبدى
يتبعه بالضروره اذا استمر تكسير الخلايا مرحله التليف (liver fibrosis) ثم يليها مرحله التشمع او التليف المتقدم (cirrhosis) و ما ياتى معه من مشاكل كزياده ضغط دم الوريد البابي و تضخم الطحال و دوالى المرئ و الاستسقاء
مش بس كده ده النحاس بيخرج من الكبد لعدم قدرته على استيعاب كل النحاس المتراكم و يبدء يروح اماكن اخرى و انسجه اخرى
و فى صوره شهيره حاول تبحث عنهاعلى النت لترسبات النحاس فى العين يطلق عليها (Kayser–Fleischer rings)

التخيل ده حقيقي و موجود فى مرض اسمه (Wilson's disease) و هو مرض جينى ناتج عن خلل فى جين بروتين ويلسون
طيب ازاى بيتشخص المرض ده ؟؟
 بص ببساطه حنفهم الاتى
النحاس اللى راح الكبد مش عارف يرتبط بالناقل بتاعه .... تمام
يقوم الكبد مقلل تصنيع الناقل ده لانه ملوش لزمه حاليا مش عارف يعمل بيه حاجه
فيخرج النحاس للدم بدون الناقل و بالتالي فيسهل فلترته فى الكليه (لما كان مع الناقل مكنش يتفلتر لكبر حجم البروتين الناقل) فيبقي موجود فى البول بكثره و كمان يقل من الدم
اذن الثلاث تحاليل اللى بتميز مرض ويلسون هى :
Low serum ceruloplasmin
Low serum copper level
High 24 hours urine copper
و الاخير ده التحليل الاساسي للتشخيص و اذا كانت نتيجته اعلى من 100 ميكروجرام فى ال 24 ساعه بول يعتبر التشخيص مؤكد
ملحوظه : بيتم تجميع بول ال 24 ساعه فى التحليل ده على 10 مل حمض هيدروكلوريك
كده فهمنا لما نشوف request مطلوب فيه التحاليل دى ايه هدفها و بتطلب ليه
د/ خالد مجدى
د/على العربى