تحليل ASO Anti-streptolysin O

تحليل ASO

  Anti-streptolysin O

ايه هو وازاي يتعمل وامتى وليه ؟

كيف يكون ايجابي كاذب أو سلبي كاذب ؟

 

تحليل aso
التحليل ده بيتعمل عشان يقيس الأجسام المضادة Anti-streptolysin O اللي بيفرزها الجسم ضد streptolysin O اللي بيفرزه الميكروب السبحي عشان يكسر خلايا الدم الحمراء، وده بيفرز غالبا لما تكون streptococcal infection من المجموعة أ .

يبقى تحليل ASO ده specific للعدوى دي تحديدا يعني وجوده يدل على إن المريض مصاب بهذا الميكروب أو سبق له الإصابة به .

هو لو حصل streptococcal infection امتى هيظهر الـ ASO ؟

بداية أشهر أعراض الـ streptococcal infection هي التهاب الحلق واللوزتين ، ودي بتكون العدوى الأساسية والأعراض الأولى لها.
لما بتحصل العدوى دي يبدأ الـ ASO في الظهور خلال أسبوع ، ويوصل لأعلى قيمة له خلال حوالي شهر (تحديدا من 3-5 أسابيع) وبعدها يفضل في الدم لمدة 6 شهور وممكن يفضل لمدة سنة.

امتى بقى الدكتور بيطلب تحليل ASO ؟

الدكتور بيطلب التحليل ده لما يلاقي على الطفل أو المريض بعض الأعراض اللي تخليه يشك في وجود

Rheumatic fever    OR    Glomerulonephritis

الشكاوى المعروفة عندنا كلنا إنها أعراض الحمى الروماتيزمية هي وجع المفاصل خاصة الركب والرجلين، وممكن ارتفاع الحرارة واضطراب ضربات القلب palpitations أو هبطان وأعراض الـ endocarditis عموما .

خاصة لو كانت الأعراض دي بعد إصابة قريبة بالتهاب الحلق واللوز اللي هي دليل اصلا على عدوى ستريب حدثت قريبا .

الطريقة المعملية لتحليل ASO
يفضل استخدام السيرم في التحليل لأن البلازما فيها عوامل التجلط ودي بروتينات ذات وزن جزئي كبير فممكن تسبب خشونة في الخليط ودي ممكن تخدع وتعتبر خطأ على إنها إيجابي .

الطريقة

تجيب الكاشف بتاعك تسيبه ياخد درجة حرارة الغرفة .

ناخذ أحجام متساوية من السيرم والكاشف، مثلا 20 من السيرم على 20 من الكاشف وتمزجهم ببعض وبعدين تقلبهم لمدة دقيقتين . لو اعطى سلبي (مفيش تجمعات) يبقى النتيجة سلبي خلاص مفيش مشكلة. لو اعطى تجمعات يبقى ايجابي وده تتر الـ 200 .

نعمل التتر اللي بعده ، والتخفيف لازم يبقى بمحلول ملحي كالآتي :

10 سيرم + 10 ملحي + 20 كاشف ، تمزج وتقلب دقيقتين ، لو اعطى سلبي في التتر ده يبقى النتيجة 200 بتاعت التتر اللي قبله اللي كان ايجابي ، ولو اعطى ايجابي هتعمل اللي بعده.

5 سيرم + 15 ملحي + 20 كاشف ، لو ايجابي يبقى 800 وتعمل اللي بعده ولو سلبي يبقى 400 اللي هي نتيجة التتر اللي قبله.

ما هى  الأشياء اللي ممكن تعمل نتيجة سلبي كاذب ؟
- إن التحليل يتعمل في وقت مبكر قبل ظهور الأجسام المضادة في الدم.

- العلاج بالكورتيزون أو corticosteroids

- العلاج بمضادات حيوية، ومنها طبع البنسلين ممتد المفعول .
- حالات أمراض antibody deficiency

ما هى الأشياء اللي ممكن تعمل نتيجة ايجابي كاذب ؟
بعض الأشياء ممكن تتداخل مع التحليل وتعطي ايجابي كاذب ، بس عموما بتعطي تتر صغير غير مؤثر غالبا، أهمها :
- اجراء التحليل من البلازما لما تقدم ذكره .
- ارتفاع الدهون في السيرم .
- ارتفاع الجلوبيولين في السيرم .

تفسير النتيجة
- لو النتيجة سلبي بس الأعراض موجودة بشكل شبه مؤكد يبقى الدكتور هيطلب التحليل يتعاد مرة تانية بعد ما يفوت مدة (حوالي اسبوعين) بحيث تظهر الأجسام المضادة (ASO) لو كانت لسه مظهرتش أو متأثرة بعلاج بياخده المريض.

- لو طلع تتر عالي والأعراض موجودة يبقى خلاص تشخيص سليم وياخد العلاج.

- أما بقى لو طلع تتر عالي ومفيش أعراض فالدكتور ممكن يعيده بعد شهر مثلا ويشوف : لو قل يبقى خلاص عدوى وانتهت ولو زاد أو فضل زي ما هو يبقى عدوى أكيدة .

على فكرة الـ O اللي في اسم تحليل Anti-streptolysin O  

دي جت منين ؟
حرف الـ O ده جاي من كلمة  Oxygen labile
لأن في نوع تاني من الاستربوليسين بيكون Oxygen stable ويرمز له بحرف S بدلا من O يعني بيكون اسمه  Anti-streptolysin S

 

_________________________________________

منقول عن 

دكتور / محمود سعد

أخصائى التحاليل الطبية

معمل الصحابة